Gjyqi për tragjedinë në “Pulse” hyn në fazë vendimtare, paraqiten prova të reja

Seanca e sotme dëgjimore po shqyrton provat materiale të propozuara nga Prokuroria.

Një seancë e re dëgjimore për zjarrin tragjik në diskoteken Pulse në Koçan po mbahet sot në sallën e gjyqit në Idrizovë, ku gjykimi vazhdon me prezantimin e provave materiale të propozuara nga Prokuroria.

Në seancën e mëparshme dëgjimore, u paraqitën dokumente që lidheshin me inspektimet e kryera nga inspektorët komunalë para zjarrit. Provat përfshinin raporte mbi punën e tyre, autorizimet për inspektorët e ndërtimit, si dhe dokumentacionin për inspektimet dhe kontrollet e përbashkëta në terren.

Mbrojtja ende pohon se aktakuza mbulon shumë njerëz dhe veprime, duke vlerësuar se është shumë e gjerë. Gjykimi vazhdon me shqyrtimin e materialit provues që duhet të ndihmojë në hedhjen dritë mbi rrethanat që lidhen me njërën prej tragjedive më të mëdha në historinë e kohëve të fundit të vendit.