Greqia do t’i gjobit me nga 100 euro personat mbi 60-vjeç që refuzojnë të vaksinohen kundër coronavirusit
Banorët në Greqi mbi moshën 60 vjeç do të gjobiten me 100 euro në muaj nëse nuk do të vaksinohen kundër coronavirusit.
Masa u njoftua në përgjigje të rritjes së rasteve dhe shfaqjes së variantit Omicron. Ai do të hyjë në fuqi më 16 janar gjersa gjoba do të zbatohet në faturat e tyre tatimore, tha kryeministri Kyriakos Mitsotakis.
“Varianti i ri Omicron është një shqetësim për ne dhe kjo do të thotë se ne duhet të jemi vigjilentë”, tha Mitsotakis.
“Fatkeqësisht, nga 580 mijë të pavaksinuar të bashkëqytetarëve tanë mbi 60 vjeç, vetëm 60 mijë kanë vendosur të vaksinohen”, tha ai. “Por janë kryesisht personat mbi 60 vjeç që kërkojnë trajtim spitalor dhe fatkeqësisht humbin jetën. Këto vdekje janë të panevojshme”, shtoi kryeministri grek.
Numri i vdekjeve në Greqi tejkaloi 18 mijë këtë javë me infeksione të konfirmuara në nivele rekord, pasi afërsisht një e katërta e popullsisë së rritur të vendit mbetet e pavaksinuar, raporton euronews.
Vaksinimi i detyrueshëm u prezantua gjatë verës për punonjësit e kujdesit shëndetësor dhe zjarrfikësit, ku ata që nuk pranonin të vaksinoheshin, pezulloheshin nga puna për një kohë të pacaktuar pa pagesë.
