Raporti, më i fundit për vitin 2025, tregon se inflacioni është lehtësuar gradualisht gjatë vitit, por në mënyrë të pabarabartë. Inflacioni arriti shkurtimisht në 3 përqind në shtator përpara se të binte në 2.7 përqind deri në nëntor, kryesisht për shkak të rritjes më të ngadaltë të çmimeve të benzinës, makinave të reja dhe produkteve të tjera, sipas US Today.
Krahasuar me nëntorin, çmimet e konsumit u rritën me 0.3 për qind në dhjetor. Kontribuesit më të mëdhenj në këtë rritje ishin çmimet e banesave dhe të ushqimeve, të cilat u rritën përkatësisht me 0.4 dhe 0.7 për qind gjatë muajit, ndërsa çmimet e energjisë u rritën me 0.3 për qind.
I ashtuquajturi inflacion bazë, i cili përjashton ushqimin dhe energjinë dhe që monitorohet posaçërisht nga Rezerva Federale, mbeti i qëndrueshëm në 2.6 përqind, i njëjtë me atë të nëntorit.
Një anketë e Rezervës Federale të Nju Jorkut tregon se konsumatorët presin që inflacioni të rritet në 3.4 përqind në afat të shkurtër dhe kanë frikë se do të jetë më e vështirë për ta të paguajnë borxhet e tyre në tre muajt e ardhshëm. Ekonomistët thonë se kjo pasqyron situatën e pabarabartë financiare midis familjeve, megjithëse disa mund të shohin lehtësim të përkohshëm në vitin 2026 përmes rimbursimeve më të larta të taksave.
Ky raport mbi inflacionin do të jetë i rëndësishëm për vendimin e Rezervës Federale mbi normat e interesit në takimin e saj në fund të janarit. Me inflacionin ende mbi objektivin e tij prej dy përqind dhe normën e papunësisë në rënie në dhjetor, tregjet tani kanë më pak gjasa të presin një ulje tjetër të normës.
Shumica e analistëve besojnë se banka qendrore e SHBA-së do ta mbajë normën e saj bazë të interesit në një interval prej 3.5 deri në 3.75 përqind, pas tre uljeve të njëpasnjëshme në fund të vitit të kaluar.
