Johnson, kundër marrëveshjes së re të Brexit: Do ta kem shumë të vështirë ta mbështes

Ish-kryeministri britanik Boris Johnson tha se do të ishte shumë e vështirë për të që të votonte për një marrëveshje të re tregtare pas Brexit me Irlandën e Veriut, duke thënë se marrëveshja i jep kontrollin Bashkimit Europian.

Duke folur në Samitin Global Soft Power 2023, Johnson theu heshtjen e tij për marrëveshjen e re që kryeministri Rishi Sunak e përshkroi si historike.

Por Johnson, aleatët e të cilit e akuzojnë Sunak se e ka ndihmuar për ta rrëzuar atë nga posti si kryeministër, tha se marrëveshja bëri pak më shumë sesa lejoi BE-në të mbajë kontrollin mbi Irlandën e Veriut.

“Do ta kem shumë të vështirë të votoj për diçka të tillë sepse mendoj se duhet të bëjmë diçka ndryshe”, tha Johnson.

“Por duhet të jemi të qartë se çfarë po ndodh këtu. Kjo nuk ka të bëjë me kthimin e kontrollit nga Mbretëria e Bashkuar, BE-ja me mirësjellje po përpiqet për të na lejuar të bëjmë atë që duam në vendin tonë.

Jo bazuar në ligjet tona, por të tyre”.

Sunak arriti një marrëveshje të re me Bashkimin Europian të hënën për të lehtësuar kufizimet tregtare në Irlandën e Veriut, duke thënë se ai dëshiron të përmirësojë marrëdhëniet me bllokun europian. Marrëveshja pritet të votohet në Kuvend.