Karikimi i makinave elektrike në Itali më i shtrenjtë se karburanti
Një rritje e madhe e çmimit të energjisë elektrike ka rritur në mënyrë dramatike kostot për drejtuesit e makinave elektrike, sipas një studimi të fundit në Itali.
Karikimi i një makine elektrike sot në Itali kushton 161% më shumë se vitin e kaluar – për shkak të çmimit të energjisë elektrike, raportoi uebfaqja italiane Facile.
“Për shkak të rritjes së çmimit të energjisë, në disa raste karikimi i një makine elektrike është më i shtrenjtë se ai tradicional. Dhe nëse e karikoni në një stacion publik karikimi në vend të shtëpisë, çmimet janë edhe më të larta”, thuhet në raport.
Ekspertët vlerësuan se kostot e mëparshme të karikimit të një makine elektrike në vend ishin 50-70% më të ulëta se karikimi i modeleve me benzinë ose naftë. Tani, një bateri e plotë në një “makinë të gjelbër” mund të kushtojë më shumë se një rezervuar plot karburant.
Hulumtimi thekson se për makinat e vogla të segmentit B, benzina për një kilometrazh prej 1000 kilometrash do t’i kushtonte pronarit 83 euro. Për një makinë me naftë, kostot do të ishin 71 euro. Në të kundërt, një makinë me motor elektrik do të kushtonte 85 euro për të kaluar në të njëjtën distancë, edhe pse vetëm një vit më parë kjo shumë ishte vetëm 33 euro.
Sipas ARERA (Autoriteti Rregullator Italian për Energjinë, Rrjetin dhe Mjedisin), në tremujorin e tretë të 2022, të ashtuquajturat Çmimet e unifikuara kombëtare të energjisë elektrike janë rritur me gati katër herë krahasuar me tremujorin e parë. Rrjedhimisht, ARERA ka marrë masa shtesë për të ndaluar rritjen e ardhshme të çmimit të energjisë elektrike. Në përgjithësi, një familje mesatare italiane pritet të shpenzojë mesatarisht 1,322 euro në vit për energji elektrike, ndërsa në vitin 2021 kostoja mesatare e energjisë elektrike ishte 632 euro.
Tarifat e energjisë elektrike në Itali panë një rritje rekord muajin e kaluar, duke arritur në 136% nga viti në vit, sipas një studimi të publikuar nga Unioni Kombëtar i Konsumatorit. Kreu i gjigantit kryesor të energjisë italiane Nomisma Energia tha javën e kaluar se Italia, së bashku me pjesën tjetër të Evropës, priste një goditje energjie të përmasave të paprecedentë, pasi çmimet e energjisë elektrike pothuajse u dyfishuan. Sipas tij, italianët duhet të përgatiten për shpenzime racionale gjatë muajve të ftohtë të dimrit. Ai po ashtu u bëri thirrje amvisërive që të përdorin metoda alternative të ngrohjes, si djegia e drurit dhe peletit, ndonëse shtoi se edhe për këto janë rritur çmimet.
