Konfirmohet se është fundosur luftanija Moskva, krenaria e marinës ruse

Anija luftarake ruse Moskva është përmbytur, njoftoi ministria ruse.

Ministria e Mbrojtjes e Rusisë ka lëshuar një deklaratë duke thënë se luftanija e tyre Moskva, anija kryesore e flotës ruse në Detin e Zi është fundosur.

Është ende e paqartë nëse është goditur nga armët ukrainase. Anija besohet se ka pësuar dëmtime të konsiderueshme dhe mendohet se ishte nisur për në Sevastopol të Krimesë, përpara se të fundosej, raporton skynews.

“Anija Moskva humbi stabilitetin e saj kur u tërhoq në port për shkak të dëmtimit të trupit të anijes që mori gjatë zjarrit nga shpërthimi i municioneve. Në kushte deti të stuhishme, anija u përmbyt”, njoftoi ministria.

Moskva është 186 metra e gjatë me afro 500 anëtarë të ekuipazhit dhe është krenaria e marinës ruse në Detin e Zi.

E vlerësuar fillimisht në Marinën Sovjetike si Lavdia e viteve 1980, anija u riemërua Moskva në vitin 1995 dhe, pas një rinovimi, rihyri në shërbim në vitin 1998, sipas ueb-sajtit ushtarak Naval-Technology.com.

Moskva është e armatosur me një sërë raketash anti-anije dhe kundërajror, si dhe me silurët, topat detarë dhe sistemet e mbrojtjes kundër raketave.

Ndryshe, Moskva është anija e dytë e madhe detare ruse që u fundos gjatë luftës në Ukrainë.

Në fund të muajit mars, Ukraina njoftoi se një sulm me raketë kishte shkatërruar një anije ruse në portin e Berdyanskit.