(Foto) Konflikt i armatosur në Prishtinë, një i vdekur dhe pesë të plagosur

Një person dyshohet se ka mbetur i vdekur dhe pesë të tjerë janë plagosur në një përleshje me armë zjarri në lagjen Aktash në Prishtinë.

Sipas informacioneve nga Qendra Klinike Universitare e Kosovës, nga Klinika Emergjente, tre prej të plagosurve janë në gjendje të rëndë.

Dyshohet se në konflikt janë përfshirë dy grupe derisa, sipas informacioneve, në konfliktin që ndodhi rreth orës 22:00 të natës së të dielës u përdorën edhe armë të gjata.

Siç merr vesh klankosova.tv nga burimet e saj, i vrari është Premtim Gashi nga grupi i Capave.

Mësohet se tashmë i ndjeri, ishte anëtar me shumë ndikim brenda grupit.

Premtim Gashi i cili sonte nuk u mbijetoi të shtënave me armë zjarri, s’kishte shumë kohë që ishte liruar nga burgu.