Kosovë/ Miratohet projektligji për pagën minimale

Kuvendi i Kosovës ka votuar në parim projektligjin që përcakton pagën minimale. 68 deputetë votuan për projektligjin, gjashtë kanë abstenuar dhe nuk pati asnjë votë kundër.

Gjatë procesit të votimit u dëgjuan thirrjet “marre” nga deputetët e opozitës, të cilët kundështuan këtë projektligj meqë nuk i përfshinte edhe veteranët e UÇK-së, të cilët javën e kaluar protestuan para Kuvendit të Kosovës.

Kryeparlamentari Glauk Konjufca ka thënë se të gjitha debatet kanë përfunduar për këtë çështje dhe se s’do t’i kthehen edhe njëherë.

Megjithatë, deputeti i AAK-së, Besnik Tahiri, mori fjalën para votimit për të propozuar heqjen e tij nga rendi i ditës dhe që projektligji të kthehet prapë në Qeveri.

“Në seancën e kaluar kemi pasë një diskutim të gjatë dhe kemi kërkuar që ligji në fjalë që përcakton pagën minimale dhe të kthehet në qeveri. Për qëllimin që po ndodh s’ka kurrfarë impakti, sepse në shumicën ka arritur paga minimale në 250. E largon një kategori të nderuar të vendit nga lidhja me pagën minimale. Kërkesa jonë është shumë e thjeshtë – të diskutohet edhe reforma sociale. Ky ligj të tërhiqet nga ministri Murati dhe të ulemi e të diskutojmë. Është kërkesë legjitime që është minimale në raport me krejt çështjet që i kemi ngritur, s’ka të bëjë me pozicion opozitar as politik. Po e largojmë, propozimi im është ky, nëse pajtohemi. Nëse e miratojmë këtë bëjmë një gabim shumë të madh”.