LeBron Xhejms zyrtarizon të ardhmen e tij në NBA
Basketbollisti LeBron Xhejms, përmes një deklaratë të dhënë në “ESPN”, ka konfirtmuar se do të vazhdojë të luajë basketboll. Pak kohë më parë, ai u shpreh se do të mendohej për të ardhmen e tij. 38-vjeçari luan prej 5 sezonesh me Lejkersin, ekip me të cilin ka ende edhe një vit kontratë.
Kështu, sezoni i ardhshëm do të jetë i 21-ti radhazi për LeBron Xhejmsin në NBA, duke u bërë lojtari i gjashtë që arrin këtë rezultat, pas Dirk Novitzkit, Kevin Garnetit, Robert Perishit, Kevin Uillis dhe Vins Karterit (ky i fundit mban rekordin me 22 sezone). Ai ka fituar 4 tituj kampionë në NBA.
“Nuk ka rëndësi se sa pikë do të realizoj apo se çfarë mund dhe nuk mund të bëj në fushë”, tha Xhejms, tashmë 38 vjeç dhe shënuesi më i mirë në historinë e NBA.
“Pyetja e vërtetë për mua është a mund të luaj ende pa e tradhëtuar këtë sport? Ditën kur nuk do të mund të jap më maksimumin në fushë do të jetë dita që do të largohem”, tha LeBron.
“Për fatin tuaj të mirë, ajo ditë nuk ka ardhur ende, ndaj do të vazhdoj të luaj. Sot dua t’ju them sërish një gjë që e kam thënë miliona herë: E dua basketbollin. Kam ende për t’i dhënë këtij sporti. kur shoh këta djem që më motivojnë për të luajtur karikohem më shumë”, u shpreh LeBron Xhejms.
