Marrëdhëniet e SHBA-së me Pakistanin kanë marrë një vrull të ri

Një vrull i ri po vërehet në marrëdhëniet midis Pakistanit dhe SHBA-së, të cilat ishin përkeqësuar me marrjen e Afganistanit nga Talibanët, sipas një eksperti pakistanez.

“Marrëdhëniet e ngushta të Pakistanit me Kinën janë një nga faktorët më të rëndësishëm në afrimin Uashington-Islamabad”, tha për Anadolu Agency, Ameer Abdullah Khan, një ekspert i marrëdhënieve ndërkombëtare në Universitetin e Mbrojtjes Kombëtare të Pakistanit.

“Varësia në rritje e Pakistanit nga Kina për nevojat e saj ekonomike dhe të mbrojtjes ishte thelbësore në pranimin e marrëveshjes së F-16 nga SHBA-të,” theksoi Khan.

Me afrimin me Pakistanin, Uashingtoni po i dërgon një mesazh Indisë si dhe Kinës, tha Khan, duke shtuar se qëndrimi i Nju Delhit për luftën në Ukrainë dhe blerja e tij e energjisë ruse i shtynë SHBA-të të bëjnë këtë lëvizje.

Rritja e fundit e vizitave të nivelit të lartë nga zyrtarët pakistanezë në SHBA dhe miratimi i Uashingtonit për shitjen e një pakete mbështetëse F-16 në Islamabad me vlerë 450 milionë dollarë tregon një vrull në rritje në marrëdhëniet dypalëshe.

Pasi talebanët morën kontrollin e Afganistanit në gusht të vitit të kaluar, marrëdhëniet midis SHBA-së dhe Pakistanit u bënë të ftohta, duke pasur parasysh historinë e gjatë të mbështetjes së Islamabadit për talebanët. Përveç kësaj, vizita e atëhershme e kryeministrit pakistanez Imran Khan në Moskë në ditën kur Rusia nisi pushtimin e saj në Ukrainë, përkeqësoi tensionet midis Uashingtonit dhe Islamabadit.

Vërejtjet e Khan për largimin e tij nga detyra, për të cilat ai fajësoi bashkëpunimin midis opozitës dhe SHBA-së, ishin gjithashtu një faktor tjetër në përkeqësimin e marrëdhënieve.

“Vizitat e nivelit të lartë të kryeministrit, ministrit të jashtëm dhe komandantit të forcave tokësore në SHBA shënojnë rinxehjen e marrëdhënieve, të cilat ranë në nivelin e tyre më të ulët pas kontrollit të Afganistanit nga Talibanët dhe tregimit të Imran Khan për një komplot anti-SHBA. ”, vuri në dukje ai.

Khan tha më tej se qeveria e kryeministrit aktual Shehbaz Sharif vlerëson marrëdhëniet me SHBA-në dhe do të punojë me administratën Biden në arritjen e qëllimeve të saj rajonale.

Ndërkohë, Mohammad Faisal, një ekspert në Institutin e Studimeve Strategjike Islamabad, tha se qeveria e re në Pakistan kishte nevojë për mbështetjen e SHBA-së për të ringjallur një marrëveshje me Fondin Monetar Ndërkombëtar (FMN) dhe për këtë arsye, administrata e Sharifit po përpiqet të hapë një faqe e re me Uashingtonin.

Pakistani ishte në prag të falimentimit në qershor dhe korrik dhe po përpiqej të vendoste kontakte të ngushta me SHBA-në, tha Faisal, duke shtuar se fatkeqësia e përmbytjeve ishte efektive në krijimin e një marrëdhënie urgjente me Uashingtonin.

Pas fatkeqësisë së përmbytjeve në Pakistan, shumë zyrtarë dhe kongresmenë amerikanë vizituan këtë vend. Uashingtoni deri më tani ka dhënë 66 milionë dollarë ndihmë për viktimat e përmbytjeve pakistaneze.

Në korrik, Donald Blome u emërua si ambasador i ri në Pakistan, një post që nuk ishte plotësuar për katër vjet./AA