Курти: Косово не ја прифаќа Заедницата на српски општини како услов за членство во Советот на Европа

Премиерот на Косово Аљбин Курти кажа денес дека неговата влада нема да прифати формирање на Заедницата на општини со српско мнозинство како услов на Косово во Советот на Европа.

Тој, зборувајќи на седницата на владата во Приштина, кажа дека Косово се соочува со „нов услов, кој нема врска со членството“ во Советот на Европа.

„Владата не го прифаќа условувањето на членството во Советот на Европа со Заедницата. За нормализацијата на односите со Србија разговараме во Брисел, а не во Стразбур“, кажа Курти.

Франција и Германија побараа од Косово да преземе чекори кон формирање на Заедницата на српски општини набрзо откако Парламентарното собрание на Советот на Европа на крајот на април ја усвои препораката Косово да се прими во членството.