Мостот од Аеродром до Гази Баба ќе биде готов за година и половина, уверува Арсовска

Екипата на Алсат е меѓу ретките кои со автомобил го поминува новиот мост на Вардар кој треба да ги спои општина Аеродром со Општина Гази Баба. Според информациите, овој мост нема да биде пуштен во сообраќај уште година и половина бидејќи има уште 100 предмети за експропријација. Ситуацијата покажува дека мостот во моментов завршува речиси во дворовите на овие куќи.

Доколку до крајот на годинава теренот биде чист, без предмети за експропријација, градоначалничката на Скопје Данела Арсовска вели дека ќе биде распишан тендер за изградба на булеварот кој треба да поминува помеѓу куќите, бидејќи и тоа не е завршено од стана на екс градоначалникот. Станува збор за булевар кој населбата Ќерамидница ќе ја спои со новиот трговски центар. Арсовска го обвинува претходното раководство дека целиот проект се работел неплански и неажурно.

„Од вкупно 275 постапки за експропријација, за три години претходното раководство успеало да разреши 31 предмет, а со осум предмети успале да влезат во процес на спор. Ние само за четири месеци успеавме да решиме 82 предмети“, рече Арсовска.

Пред речиси две години на овој човек кој со својата фамилија тука живее со децении Град Скопје му понудил обештетување од 450 евра станбена површина, за да го отстапи имотот. Тој и останатите соседи не се согласиле. Сега се во неизвесност, дали ќе добијат подобра понуда или ќе се соочуваат со нови проблеми.

„Не знам до кога вака ќе не малтретираат. Мостот е направен, треба со време да се среди и ние да се обезбедиме. Како ќе ни платат, на куќите да направат проценка, да можеме веднаш да купиме“, вели еден граѓанин.

Мостот во Аеродром започна да се гради пред точно две години, а уште толку ќе треба да се работи за проектот да биде комплетиран. Повеќе од триесет години овој мост беше во речиси сите програми на локалните и централните власти.

Иле Петревски