Пендаровски: Постапката на Радев го урива принципот на немешање во внатрешните работи

Властите во Македонија остро го критикуваа бугарскиот претседател Румен Радев, кој вчера на заеднички состанок ги повика бугарските специјални служби да ги заштитат Бугарите во Македонија. За претседателот Стево Пендаровски и за премиерот Зоран Заев, постапката на Радев е мешање во внатрешни работи. И Пендаровски и Заев ги отфрлија обвинувањата дека одредени граѓани се напаѓани и дискриминирани само затоа што се декларираат како Бугари, како што тврди културниот центар од Битола „Иван Михаилов“.

„Исклучително е невообичаено и надвор од процедурите на Алијансата, претседател на земја членка на НАТО да ги повика безбедносните служби да одговорат на повредите на правата на граѓаните во друга земја членка на НАТО. Реакцијата на бугарскиот претседател е исто така спротивна на основниот принцип на меѓународната политика, да не се меша во внатрешните работи на друга држава“, вели Пендаровски.

Според специјалниот пратеник, Владимир Бучковски, постапката е обид да се наметне билатерален спор во изборната кампања.

Бугарската министерка за надворешни работи Екатерина Захариева исто така го бранеше Радев. Според неа, проблемот не е Софија, туку Скопје, кое го оспорува правото на самоопределување на своите граѓани.

„Јасно е дека реагираме на секој случај и се надевам дека и колегите во Северна Македонија ќе започнат да реагираат. Бидејќи на крајот на краиштата, тие се и нивни граѓани, тие живеат таму. Над 100.000 граѓани на Северна Македонија имаат двојно државјанство, вклучително и бугарско државјанство со докажано бугарско потекло. Овие граѓани се заплашени и дискриминирани“, рече Захариева.

Скопје и Софија сè уште не ги разјаснија техничките детали за Акциониот план, што е предуслов за одржување на билатерална меѓувладина конференција.

Анеса Салиху