Рекорден број на смртни случаи во Бразил, болниците преполнети

Додека централните власти во Бразил и провинциите расправаат околу набавката на вакцините, државата бележи рекорден број смртни случаи од епидемијата. Единиците за интензивна нега се преполни и сè погласно и погласно се бараат најстроги превентивни мерки.

Во последните седум дена Бразил бележеше просечно околу 1.400 смртни случаи дневно поврзани со коронавирусот.

Новиот бран галопира во најголемата земја во Латинска Америка и нема индиции дека наскоро ќе се смири. Досега во Бразил се регистрирани 262.770 смртни случаи од пандемија.

Бранот веројатно бил активиран од варијантата П.1, која за прв пат е откриена во Амазон, оценуваат  експертите. Прелиминарната студија, објавена минатиот понеделник од Универзитетот во Оксфорд и Тропскиот институт на Универзитетот во Сао Паоло, укажува на тоа дека варијантата е 1,4 до 2,2 пати позаразна од оригиналната. Покрај тоа, се вели дека мутанот, именуван по Манаус, главниот град на провинцијата Амазон, постојано доведувал до обновување на инфекциите кај пациенти кои веќе биле излекувани.