Во Албанија пристигнаа првите Авганистанци, долетаа од Грузија

Во раните утрински часови, на аеродромот Ринас во Албанија пристигнаа првите Авганистанци. Станува збор за 121 лице. Тие допатуваат со патнички авион од Тбилиси, Грузија. Меѓу пристигнатите има и 11 бебиња. Според извештаите, тие пристигнале во три часот по полноќ, а станува збор за авганистански државјани кои работеле за американската мисија во таа земја. Тие прво ќе бидат прегледани од лекари, а потоа ќе бидат префрлени во Драч, Тирана и други градови во Албанија каде ќе останат додека не добијат американски визи. На пречекот беа министерката за надворешни работи, Олта Џачка и американската амбасадорка, Јури Ким.

„Ова не се однесува само на традиционалното гостопримство и бесата на Албанците. Ова е исто така прашање на морална обврска бидејќи овие Авганистанци кои се учители, уметници, интелектуалци, активисти за граѓанско општество, за човекови права и за права на жените, беа 20 години наши сојузници во НАТО, веруваа во визијата за модерен Авганистан и ризикуваа да работат за да ја направат таа визија реалност“, изјави Олта Џачка, министерка за надворешни работи на Албанија.