MPB shpallë konkurs për pranimin e 600 policëve – A kanë numër të garantuar shqiptarët?

Gazetar: Adrian Kerimi

Ministria e Brendshme nuk tregon për numrin e kandidatëve shqiptarë që parashikohet të pranohen në konkursin e hapur për 600 policë, shkruan Alsat.

Në përgjigjen e MPB-së thuhet se gjatë punësimit duhet të ketë policë nga të gjitha etnitë, pa përcaktuar nëse përqindjet për shqiptarë janë ndarë, janë rritur ose zvogëluar falë përfaqësimit të drejtë dhe adekuat.

“Gjatë punësimit në polici duhet të përfaqësohen në mënyrë adekuate qytetarë nga TË GJITHA PËRKATËSITË ETNIKE të cilët plotësojnë kriteret profesionale dhe kompetencat e parapara”, thonë nga Ministria e Punëve të Brendshme.

Do të punësohen policë në të gjithë sektorët, ndërsa numri më i madh i tyre janë paraparë në Shkup, Tetovë dhe në Shtip.

Gjithashtu do të punësohen 170 policë në katër Qendrat rajonale për çështje kufitare në veri, perëndim, jug dhe lindje.

Pas ndryshimeve, ligjore në këtë konkurs është përfshirë edhe kushti që kandidatët të mos jenë anëtarë të ndonjë partie politike dhe të mos ketë post në organet partiake.

Ndërkohë Ministria e Brendshme heshtë mbi konkursin e brendshëm për pjesëtarë në njësinë speciale të anti-terrorit “Tigrat”.

Në muajin prill kanë përfunduar filtrat përzgjedhëse, ndërsa akoma nuk dihet nëse në këtë njësit për herë të parë që nga formimi do të ketë edhe pjesëtarë shqiptarë ose jo.

Paraprakisht zyrtarë të MPB-së kishin deklaruar se tek “Tigrat” dera do të jetë e hapur për të gjitha atë që plotësojnë standardet profesionale, pa marrë parasysh përkatësinë e tyre etnike./ Alsat.mk