Ndryshojnë çmimet e derivateve – benzina bie, dizeli rritet

Gazetar: Angel Dimovski

Shoferët e automjeteve në Maqedoni nga sonte do të furnizohen me naftë më të shtrenjtë. Komisioni Rregullator i Energjetikës ka miratuar vendim me të cilin çmimi i naftës rritet për një denar e gjysmë, ndërsa çmimet e benzinave ulen për dy denarë. Nga mesnata do të zbatohen këto çmime: Eurosuper BS-95 do të kushtojë 86,00 denarë për litër; Eurosuper BS-98 do të kushtojë 88,00 denarë për litër; Nafta do të kushtojë 87,00 denarë për litër kurse vaji ekstra i lehtë për amvisëri do të kushtojë 89,00 denarë për litër.

Këto janë çmimet maksimale me pakicë. Ndërkohë, OKTA ka vendosur ulje prej 2 denarë për litër për benzinat në të gjitha pikat e karburantit që furnizohen me derivate nga kjo kompani, ndërsa vetë pikat e karburantit mund ta reflektojnë këtë zbritje te konsumatorët. Për momentin mbetet në fuqi masa për uljen e akcizave me 2 denarë për benzinën dhe naftën, e cila rregullohet me ligj në varësi të rritjes së çmimit në bursë.

Indekset europiane të bursave sot kryesisht shënojnë rënie, ndërsa çmimi i naftës është rritur ndjeshëm për shkak të tensioneve të reja ndërmjet Iranit dhe Izraelit. Investitorët druajnë se një përshkallëzim i mundshëm i konfliktit mund të destabilizojë më tej situatën në Lindjen e Mesme dhe të shkaktojë tronditje të reja në tregjet energjetike.

Sipas të dhënave të bursës, çmimi i naftës së papërpunuar amerikane WTI është rritur për 4 për qind dhe ka arritur në 94,20 dollarë për fuçi. Në të njëjtën kohë, çmimi i naftës Brent është rritur për 4,37 për qind, duke arritur në 97,13 dollarë për fuçi.  /Alsat.mk