Në Kosovë edhe me letërnjoftime me emrin e vjetër të shtetit, por JO dhe me pasaportë

Gazetar: Adnan Qaili

Vendkalimi kufitar në Bllacë kurrë s’ka qenë me frekuentim kaq të ulët të udhëtarëve, sidomos në dalje. Kjo ndodh ngaqë jo të gjithë qytetarët kanë ndërruar dokumentet e udhëtimit me emrin e ri të shtetit. Por, Republika Kosovës shtetasit tanë i pranon me letërnjoftime dhe patentë shoferi me emrin e vjetër të shtetit, përkatësisht pa “Veriun”. Ndërsa tentimi i një qytetari për të udhëtuar me pasaportë ishte i pasuksesshëm.

“Është problemi që nuk kam mundur ta vazhdoj pasaportën! A mundem këtu përpara të kthehem? A e ke akoma me emrin e vjetër? Po!”, tha një qytetar.

“Mentaliteti ynë i ka fajet, gabim ka bërë shteti që e ka shtyrë afatin, është dashur të gjobisë që të ju vijnë mendtë njëherë e mirë. Të gjithë presin ditën e fundit!”, u shpreh një tjetër qytetar.

Revolta më e madhe vërehet në terminalin doganor të kësaj pike kufitare. Shoferët po hasin në telashe ngaqë me dokumentet me emrin e vjetër të shtetit nuk mund të tranzitojnë në vendet tjera. Ata thonë se në shtetet e Evropës nga sot nuk mund të udhëtojnë pa dokumentet e reja të udhëtimit dhe kjo zvarritje do të shkaktoj mungesë të mallit që vjen nga jashtë shtetit për tregun e brendshëm.

“Në terminalin doganor të Bllacës shoferët e kamionëve, të cilët transportojnë mall për import dhe eksport, janë të revoltuar për shkak se nuk kanë arritur të gjithë në kohë të bëjnë zëvendësimin e dokumenteve me emrin e ri të shtetit dhe si pasojë rrezikojnë që mos të kryejnë punët e tyre dhe të bartin mallin, i cili është i nevojshëm për tregun e vendit”, raporton Adnan Qaili, gazetar.

“Si të shkoj në atë turmë, duhet të ketë çdokund pika për dhënie të dokumenteve sa më shpejtë ti kryejnë këto punë e jo të presim gjatë, shteti është dashur të përgatitet e jo të na lërë kështu. Pasaportën e kam ndërruar se e pata mbushur me vula por as patentën e as letërnjoftimi nuk e kam ndërruar akoma”, tha një vozitës.

“Patentë shoferi rreth 1 mijë denarë dhe pasaporta rreth 4,700 denarë. Nuk është në rregull se shumica e kolegëve nuk i kanë ndërruar dhe u bë problem i madh”, u shpreh një tjetër vozitës.

Nga Shoqatat e Transportuesve thonë se problemet vetëm janë ndjerë në vendkalimet kufitare me Greqinë, Bullgarinë dhe Turqinë, shtete prej të cilave importohen një pjesë e konsiderueshme e lëndëve të para por edhe të prodhimeve të gatshme për treg. Nga Asociacioni “Makam-Trans” thonë se ekonomia e vendit rrezikon të mbetet pa mallrat e importuara nëse nuk janë të ndërruara të gjitha dokumentet e udhëtimit, patentat e shoferëve, lejet e qarkullimit të automjeteve dhe ngjitësit e targave me emrin e ri. /Alsat.mk