Nga 1 dhjetori subvencionohet energjia elektrike për shkollat fillore dhe të mesme

Prej ditës së djeshme kur edhe mbaroi afati, 233 shkolla publike fillore dhe të mesme nga të gjitha qytetet nga gjithsej 474 në vend, 50 ndërmarrje publike në fushën e ujësjellësit aplikuan për furnizim të subvencionuar me energji elektrike nga 1 dhjetori.

Sipas vendimit të Qeverisë, kompanitë që prodhojnë produkte ushqimore bazë si vaj ushqimor, bukë dhe produkte furre, miell, qumësht dhe produkte qumështi, industria e mishit do të marrin energji elektrike të subvencionuar përmes “EMV-së” me çmim 80 euro për megavat/orë, për shkollat fillore dhe të mesme çmimi i subvencionuar do të jetë 95 euro për megavat/orë, po aq edhe për ndërmarrjet publike në fushën e ujësjellësit.

“Për ata që e shfrytëzuan këtë mundësi dhe u regjistruan, SHA EMV do të fillojë nga data 1 dhjetor me furnizimin e tri kategorive të konsumatorëve që mbulohen nga vendimi i Qeverisë për energjinë elektrike të subvencionuar. Subjektet që deri dje nuk kanë dorëzuar dokumente të plota do të mund ta bëjnë këtë në periudhën e ardhshme dhe do të vendosen në furnizim të subvencionuar nga 1 janari i vitit të ardhshëm, tha kryeministri Dimitar Kovaçevski. /Alsat.mk