Presidentja e KE ulet pranë nxënësve shqiptarë: Të shikojmë çfarë është ndërtuar deri më tani
Gjatë vizitës në Shqipëri, Presidentja e Komisioni Evropian, Ursula von der Leyen ka vizituar kopshtin “Europa” dhe shkollën 9-vjeçare “Korb Muça” në Fushë Krujë, ku nuk ka hezituar që të ulet pranë fëmijëve për të shijuar disa momente pranë tyre.
Presidentja e Komisionit Europian ishte e shoqëruar nga ambasadori i BE në Shqipëri, Luigi Soreca dhe kryeministri Edi Rama.
Von der Leyen nuk hezitoi të afrohej tek fëmijët e kopshtit për t’i komplimentuar për pikturat e tyre.
Ndërsa në një bisedë me prindërit, presidentja e KE tha: “Doja të shikoja kopshtin dhe shkollën dhe qenka e mrekullueshme të shikojmë çfarë është ndërtuar deri më tani. Mendoj që ky është dhe një simbol shumë i mirë i kësaj miqësie që kemi.”
Në ambientet e shkollës, presidentja e KE iu afrua fushës së basketbollit dhe duartrokiti fëmijët që po luanin aty. Pas kësaj, u fut në një klasë ku po zhvillohej mësim dhe pyeti nxënësit nëse i pëlqente shkolla dhe për lëndën që preferonin më shumë.
