Pse duhet ta lajmë bananen para se ta qërojmë?

Jeni të vetëdijshëm se po hani lëkurën e frutave dhe kushedi se çfarë fshihet brenda. Por çfarë ndodh me bananet dhe avokadot, fruta që qërohen para konsumimit? Ekspertët e sigurisë ushqimore thonë se edhe ato duhet të lahen.

“Produktet që kanë lëvozhgë duhen larë nën ujë të pastër, edhe nëse keni ndërmend ta hidhni lëvozhgën. Është një praktikë më e mirë në trajtimin e sigurt të ushqimit që zvogëlon transferimin e papastërtive ose mikrobeve që mund të jenë në lëkurën e frutave që dëshironi të konsumoni”, tha Tamika Sim nga Këshilli Ndërkombëtar i Informacionit për Ushqimin për Huff Post.

Ndërsa papastërtia mund të shihet, pesticidet e mbetura ose mikrobet që mund të shkaktojnë sëmundje ushqimore nuk janë të dukshme me sy të lirë. Kjo është arsyeja pse Sims mbron larjen e të gjithë ushqimit përpara se të hahet.

“Lëvoret e bananes, lëkurat e avokados dhe produktet e tjera me një sipërfaqe të jashtme të trashë janë po aq të ndjeshme ndaj baktereve sa frutat dhe perimet më të buta me lëkura më delikate,” vëren eksperti i sigurisë ushqimore Trevor Craig.

Administrata Amerikane e Ushqimit dhe Barnave ka gjetur listerinë dhe salmonelën në pjesën e jashtme të avokados. Lëkura më e trashë e bën më të vështirë që bakteret ose papastërtitë të futen në mish, por kur prisni frutat, mund ta kontaminoni ushqimin me thikë. Larja e lëvozhgës zvogëlon gjasat që kjo të ndodhë.