Reeker viziton sot Shqipërinë, takim me Ramën dhe Bashën

Ndihmëssekretari amerikan për Çështjet Europiane dhe Euroaziatike, Philip Reeker, viziton ditën e sotme Shqipërinë. Vizita e tij në Shqipëri është në kuadër të turit të Ballkanit. Ndërkohë, mësohet se gjatë qëndrimit në Shqipëri Reeker do të takohet me Kryeministrin Edi Rama dhe me kryetarin e Opozitës, Lulzim Basha.

Me kreun e opozitës të sapomandatuar për të drejtuar PD-në edhe për 4 vitet e ardhshme do të takohet në mesditë në orën 11:30.

Reeker pas Shqipërisë, do të udhëtojë edhe në shtetin fqinj të Maqedonisë së Veriut.
Vizita e zyrtarit të Lartë të Shteteve të Bashkuara të Amerikës vjen në një kohë kur Shqipëria nuk mori një dritë jeshile nga Bashkimi Evropian për mbajtjen e mbledhjes së parë ndërqeveritare.

Ndërkohë, ditën e djeshme Kryeministri Rama së bashku me drejtuesit e Maqedonisë së Veriut dhe Serbisë kërkuan edhe ndihmën e SHBA-së që të ndikojë te BE-ja në mënyrë që vendet e Ballkanit Perëndimor të shkojnë drejt BE-së duke e quajtur vendimin e tyre një dështim të përsëritur.