Rrëshqitje dheu në minierën e gurëve të çmuar në Birmani, dhjetëra të zhdukur

Të paktën 70 persona janë të zhdukur dhe një është konfirmuar i vdekur pas një rrëshqitjeje dheu që ndodhi gjatë natës në një minierë gurësh të çmuar të nefritit në Birmaninë veriore.

“Midis 70 dhe 100 persona janë zhdukur në një rrëshqitje dheu në vendin e Hpakant, në shtetin e Kachin”, thanë ekipet e shpëtimit.

Rreth 200 shpëtimtarë po marrin pjesë në kërkime, disa në bordin e varkave në përpjekje për të nxjerrë trupat nga një liqen.

Dhjetëra minatorë vdesin çdo vit në Birmani duke punuar në kushte të rrezikshme në guroret e nefritit, një industri e errët dhe e rregulluar dobët. Rrëshqitjet e dheut janë të shpeshta në këtë rajon të varfër dhe të vështirë për t’u aksesuar, i cili duket si një peizazh hënor pasi është modifikuar nga grupe të mëdha minerare pa marrë parasysh mjedisin.

Pas një moratoriumi në vitin 2016, shumë miniera të mëdha janë mbyllur dhe nuk monitorohen më, duke lejuar kthimin e shumë minatorëve të pavarur. Të ardhur nga komunitete etnike të pafavorizuara, këto të fundit veprojnë pothuajse në mënyrë klandestine në vende të braktisura nga ekskavatorët.

Shirat e dendur të musonit shkaktuan fatkeqësinë më të keqe të këtij lloji në vitin 2020, me 300 minatorë të varrosur pas një rrëshqitjeje dheu në masivin Hpakant, zemra e kësaj industrie, pranë kufirit kinez. Birmania nxjerr të ardhura të konsiderueshme nga prania masive në nëntokën e saj të gurit të çmuar veçanërisht të vlerësuar në Kinë.