Rreth 6.5 milion njerëz kanë vdekur në të gjithë botën nga covid-19

Rastet e regjistruara të SARS-CoV-2 të shtunën kaluan shifrën 600 milionë në mbarë botën, sipas të dhënave të mbledhura nga Universiteti Johns Hopkins.

Që nga ora 20:20 shifrat e Universitetit të Baltimores treguan se 600,449,934 infeksione janë regjistruar që nga shfaqja e virusit në Kinë në fund të vitit 2019.

Në të njëjtën kohë, vdekjet për shkak të COVID-19 ishin 6,485,233.

SHBA, me 94,184,146 raste dhe 1,043,838 vdekje nga infeksioni i shkaktuar nga virusi, mbetet shteti në botë që ka pësuar goditjen më të rëndë nga pandemia. Ato përbëjnë pothuajse 16% të rasteve dhe vdekjeve. Është vendi i parë dhe i vetëm deri më sot që ka tejkaluar 1 milion vdekje për shkak të COVID-19.

India ka numrin e dytë më të madh të rasteve (44,398,696), e ndjekur nga Franca (34,662,834). Vende të tjera me më shumë se 20 milionë raste janë Brazili, Gjermania, Britania, Koreja e Jugut dhe Italia, sipas shifrave të Universitetit Johns Hopkins.

Ekspertët besojnë se numri i vërtetë i viktimave të pandemisë së koronavirusit në mbarë botën është shumë më i rëndë. Organizata Botërore e Shëndetësisë (OBSH) vlerësoi në fillim të këtij viti se numri i viktimave të pandemisë, drejtpërdrejt ose tërthorazi, është ndoshta më afër 15 milionë të vdekur. /abcnews.al