Rusia dhe Kina po zhvillojnë një stërvitje të përbashkët ushtarake mes presionit në rritje nga Perëndimi, shkruan Daily Mail.
Rreth 13 mijë trupa nga ushtria e Kinës dhe ajo e Rusisë kanë marrë pjesë në stërvitjen e përbashkët të zhvilluar në veriperëndim të Kinës.
Sipas mediave në Rusi, kjo stërvitje pasqyron marrëdhëniet e ngushta mes Pekinit dhe Moskës. Stërvitja vjen në një moment kur Perëndimi ka tërhequr forcat nga Afganistani, ndërsa talebanët janë duke fituar terren.
Pamjet e publikuara në internet tregojnë tanket ruse e ato kineze në aksion. “Ushtria ruse goditi shumicën e objektivave, pavarësisht mungesës së përvojës me pajisjet e prodhuara nga Kina”, shkruan TV Zvezda, i cili drejtohet nga Ministria e Mbrojtjes në Rusi.
Stërvitja e përbashkët do të vijojë deri të premten në rajonin autonom Ningxia Hui të Kinës.
