Rusia: Eksportet e drithërave të Detit të Zi do të rifillojnë nëse tonat “çlirohen”

Rusia njoftoi sot se do t’i japë dritën jeshile rinovimit të marrëveshjes së eksportit të grurit në Detin e Zi, ku lejohet eksportimi i sigurt i grurit nga portet e Ukrainës, por vetëm nëse merren parasysh edhe interesat e prodhuesve të saj bujqësorë.

Marrëveshja e arritur vitin e kaluar me ndërmjetësimin e Kombeve të Bashkuara dhe Turqisë skadon më 18 mars dhe afati i saj mund të zgjatet nëse të gjitha palët bien dakord. Rusia ka thënë tashmë se është e pakënaqur me disa aspekte të marrëveshjes.

Eksportet ruse bujqësore nuk janë shënjestruar nga sanksionet perëndimore, por Moska thotë se sanksionet mbi sistemin e saj të pagesave, zinxhirin e furnizimit dhe industrinë e sigurimeve janë një pengesë për të qenë në gjendje të eksportojë drithërat dhe plehrat e saj.

Ministria e Jashtme ruse njoftoi sot se ministri i Jashtëm Sergei Lavrov diskutoi perspektivat e rinovimit të marrëveshjes gjatë takimit të tij me homologun e tij turk, Mevlut Cavusoglu, në margjinat e takimit të ministrave të jashtëm të G20 në Nju Delhi.

“Pala ruse theksoi se është e mundur të vazhdohet marrëveshja e drithit vetëm nëse merren parasysh interesat e prodhuesve rusë të grurit dhe plehrave në mënyrë që të kenë akses të papenguar në tregjet botërore”, tha ministria ruse në një deklaratë.