Rusia ka futur në listën e zezë aktorët Sean Penn dhe Ben Stiller

Njëzet e pesë shtetas të tjerë amerikanë janë futur në listën e zezë nga Rusia “në përgjigje të sanksioneve të vazhdueshme të administratës (Joe) Biden kundër qytetarëve rusë”, njoftoi sot Ministria e Punëve të Jashtme ruse.

Aktorët Sean Penn dhe Ben Stiller janë në listën e figurave politike, kulturore dhe të biznesit të cilëve u ndalohet hyrja në Rusi. Të dy aktorët hynë në listë për shkak të besnikërisë së tyre politike ndaj Ukrainës në përgjigje të pushtimit rus.

Penn dhe Stiller kanë qenë të zëshëm në mbështetjen e tyre për Ukrainën dhe janë pritur mirë nga presidenti ukrainas Volodymyr Zelensky.

Aktorëve të listës së zezë i bashkohen disa kongresmenë dhe CEO.

Politikani i rangut më të lartë në përditësimin më të fundit të listës së zezë ruse është Sekretarja e Tregtisë e SHBA-së, Gina Raimondo. Presidenti Joe Biden u fut në listë në mars.