Sali Mustafa para Gjykatës së Posaçme të Kosovës për krime lufte

Ish pjesëtari i Ushtrisë Çlirimtare të Kosovës, Sali Mustafa, u paraqit sot në Gjykatën e Posaçme në Hagë e cila trajton pretendimet për krime të luftës dhe të pasluftës në Kosovë, pak ditë pasi u arrestua nga Prokuroria e Posaçme të enjten me 24 shtator dhe u transferua në njësinë e paraburgimit në Hagë.

Ai është personi i parë i arrestuar nga Dhomat e Specializuara, ku sot gjykatësi i procedurës paraprake Nichoas Guillou, e njoftoi atë me detyrimet dhe të drejtat e tij. Zoti Mustafa ka tani një afat prej 30 ditësh që të deklarohet rreth aktakuzës së konfirmuar më 19 qershor, e cila e ngarkon atë “me përgjegjësi penale individuale për ndalim arbitrar, trajtim mizor, torturë dhe vrasje të paligjshme, që janë krime lufte sipas të drejtës ndërkombëtare”.

Sipas akuzës “afërsisht midis 1 prillit të vitit 1999 dhe 19 prillit të vitit 1999, në një kompleks ndalimi në Zllash, (një zonë në lindje të Prishtinës) janë kryer krimet e ndalimit arbitrar, trajtimit mizor dhe të torturës kundër të paktën gjashtë personave”. Gjithashtu, në aktakuzë thuhet se në një datë midis 19 prillit 1999, ose rreth kësaj date, dhe rreth fundit të prillit 1999, në atë vendndodhje u vra një i ndaluar”.