Sebastian Fetel, tërhiqet nga Formula 1?!

Ylli i Formula 1, Sebastian Fetel ka deklaruar se do të tërhiqet nga një nga sportet më të ndjekur në botë. Ky lajm nuk është pritur mirë nga fansat pasi garuesi i Formula 1 ka qenë një nga më të dashurit e publikut.

“Kam pasur privilegjin të punoj me shumë njerëz të mrekullueshëm në Formula 1 gjatë 15 viteve të fundit. Janë të shumtë ata që duhen përmendur dhe falënderuar. Në dy vitet e fundit unë kam qenë një pilot i Aston Martin dhe, megjithëse rezultatet nuk kanë qenë aq të mira sa pritej, është e qartë për mua se si gjithçka po bashkohet në mënyrë që skuadra të ketë atë që duhet për të konkurruar në nivele të larta në vitet e ardhshme.

Të gjithë janë ambiciozë, të aftë, me përvojë, të përkushtuar dhe u uroj atyre gjithë të mirat. Shpresoj që puna e bërë vitin e kaluar dhe kjo aktualja do të ndihmojë në zhvillimin e një ekipi që do të jetë i suksesshëm në të ardhmen. Do të punoj sa më shumë deri në fund të sezonit me këtë synim, duke dhënë më të mirën time në dhjetë garat e fundit, si gjithmonë.

Vendimi për t’u tërhequr ishte i vështirë për t’u marrë, kalova shumë kohë duke u menduar. Në fund të vitit dua të marrë kohë për të reflektuar në lidhje me atë që do të bëj në vazhdim. E kam të qartë se si baba që jam duhet të kaloj më shumë kohë me familjen time”, deklaroi piloti gjerman, i cili garoi edhe me Ferrarin në vitet 2015-2020.

Fetel ka shënuar emrin e tij në librin e legjendave të këtij sporti, duke fituar 4 tituj botëror, 53 gara të fituar dhe 122 herë i ngjitur në podium.

Garuesi gjerman padyshim ka pasur një karrierë të jashtëzakonshme në garat me makina në Formula 1.