Shkon në 44 numri i viktimave të bllokuara nga bora në Pakistan

Ka shkuar në 44 numri i viktimave të bllokuar nga bora në veri të Pakistanit dhe të paktën 41 të plagosur. Sipas autoriteteve vendase mes viktimave janë edhe 10 fëmijë që ngrinë në makinat e tyre të bllokuara në rrugë nga bora, e cila bllokoi qytetin Murree, në Punjab.

Rreth 1,000 automjete u bllokuan pasi thuhet se turistët nxituan për të parë reshjet e dëborës dimërore në qytetin Murree në majë të kodrës.

Një polic, gruaja e tij dhe gjashtë fëmijët e tyre, si dhe një familje tjetër me pesë anëtarë, janë në mesin e të vdekurve, sipas shërbimeve lokale të urgjencës Rescue 1122.

Temperaturat ranë në minus 8 gradë Celsius. Zyrtarët thirrën trupat paraushtarake dhe një njësi të posaçme ushtarake malore për të ndihmuar. Deri të shtunën vonë, mijëra automjete ishin nxjerrë nga dëbora, por më shumë se 1,000 ishin ende të bllokuar. Ushtria thotë se ka shpëtuar më shumë se 300 njerëz të bllokuar nga bora.

Ministri i Brendshëm Sheikh Rashid tha se kriza ishte shkaktuar nga numri i njerëzve që udhëtonin në zonë, në veri të kryeqytetit Islamabad. Më shumë se 100,000 makina kishin mbërritur në qytetin e epokës koloniale ditët e fundit, për të shijuar borën.

Zyrtarët e urgjencës shpërndanë ushqim dhe batanije për njerëzit ndërsa ata ishin të bllokuar në automjetet e tyre me borë, por shumë vdiqën nga hipotermia. Të tjerët mund të kenë vdekur nga helmimi nga monoksidi i karbonit, pasi kanë përdorur ngrohëset e makinave të tyre për periudha të gjata kohore, thanë zyrtarët.