Shqipëri, rekord rastesh ditore me COVID-19
Në Shqipëri është shënuar rekord i ri në rastet pozitive ditore me COVID-19, pasi në 24 orët e fundit janë regjistruar 16 të vdekur dhe 1.239 raste pozitive.
Ministria e Shëndetësisë dhe Mbrojtjes Sociale ka njoftuar se numri i përgjithshëm i rasteve me koronavirus në vend që nga fillimi i pandemisë është rritur në 87.528 dhe numri i të vdekurve në 1.488.
Në 24 orët e fundit janë shëruar 805 qytetarë, duke e çuar numrin e të shëruarve në 52.933 dhe raste aktive aktualisht janë 33.107.
Institucionet shëndetësore kanë kryer edhe 4.562 testime të reja, ndërsa që nga fillimi i pandemisë janë kryer gjithsej 394.242 testime për personat e dyshuar për COVID-19.
Ndërkohë, ministrja e Shëndetësisë dhe Mbrojtjes Sociale, Ogerta Manastirliu, gjatë një konference për mediat tha se janë disa arsye mbi dyshimet për prezencën e varianteve të reja të COVID19 në Shqipëri, që sipas saj duhen verifikuar nga analizat laboratorike.
