Skuadra angleze zbulon trajneri e ri nga Spanja
Zhulen Lopetegui është zyrtarisht trajneri i ri i skuadrës angleze Vulverhempton Vanderers. Trajneri bask ulet sërish kështu në një stol, pas shkarkimit nga Sevilja. Skuadra që ka marrë përsipër të drejtojë ish-trajneri i Real Madridit dhe i kombëtares spanjolle garon në Premier Ligë, por është e parafundit në klasifikimin aktual, seriozisht e rrezikuar për të zbritur një kategori më poshtë në sezonin pasues. Aktualisht, Vulverhemptoni ka 10 pikë në 13 ndeshje, një ecuri tejet negative.
Misioni i trajnerit spanjoll duket shumë i vështirë, megjithatë duke qenë i papunë për momentin ka vendosur të provojë fatin në Angli. “Ujqërit” u interesuan për të nënshkruar me trajnerin bask menjëherë pas largimit të tij nga skuadra e Sevilja, ku u shkarkua me nderime, pavarësisht rezultateve të dobëta të fundit.
Skuadra britanike e nisi garën me Bruno Lage në pankinë, por edhe ai u zëvendësua disa javë më parë. Stiv Dejvies ishte në krye në mënyrë të përkohshme deri në ardhjen e Lopetegit. Trajneri spanjoll do të përpiqet të zgjidhë situatën e një skuadre që ndodhet në një krizë të rëndë sportive. Përveç kësaj, nga Anglia po përflitet për ardhjen e mundshme në dimër të Mariano Díaz, sulmuesit madrilen që nuk po llogarit shumë minuta te Reali.