Spanja ndal ecurinë pa disfatë të Italisë
Kombëtarja e Spanjës është në finale të edicionit të sivjetshëm të Ligës së Kombeve, pasi që në gjysmëfinale mundi kombëtaren e Italisë me rezultat 2-1. Ishin mysafirët ata që gjetën golin e parë në min e 17’ përmes Ferran Torres, pas asistimi të Mikel Oyarzabal. Përkundër rasteve që kishin Federiko Bernardeski e Lorenzo Isinje, Italia nuk arriti të barazojë rezultatin dhe në nivel të detyrës ishte portieri spanjoll Unai Simon. Gjërat për Italinë u vështirësuan në min e 42’ kur me karton të kuq u largua Bonuçi, me karton të dytë të verdhë. Ndërkohë në fund të pjesës së pare, Torres shënoi golin e dytë personal për rezultatin e pjesës së parë 0-2.
Pjesa e dytë nisi me dominim të plotë të spanjollëve që menaxhonin epërsinë përmes mbajtjes së gjatë të topit dhe ‘Furia e Kuqe’ kishte disa mundësi të thellonte epërsinë, por pa arritur të shënojnë. Ishte minuta e 83’ kur italianët ngushtuan rezultatin me golin e Lorenzo Pellegrinit.
Në minutat e mbetura ekipi i Roberto Mancinit u përpoq të barazonte gjithçka dhe të dërgonte ndeshjen në vazhdime. Megjithatë Spanja u mbrojte mirë në fund dhe arriti të fitojë 1-2 duke u kualifikuar në finale të Ligës së Kombeve.
Kujtojmë se Italia pësoi disfatën e parë pas 37 ndeshjeve radhazi, pa pësuar disfatë. Ndërohë Spanja në finale takohet me fituesin e ndeshjes Francë – Belgjikë që luhet gjatë ditës së enjte.