Stuhi e fortë në Gjermani: Breshër me madhësinë e topave
Pas një vale të nxehti, pjesë të Gjermanisë janë goditur nga një stuhi e fortë që nga dje, duke sjellë shira të rrëmbyeshëm, erëra të forta, stuhi dhe breshër me madhësinë e topave të tenisit, me meteorologët që paralajmërojnë se priten fatkeqësi në orët në vijim, raportoi Reuters .
Sipas parashikimeve, në një periudhë të shkurtër kohore mund të bien midis 25 dhe 40 litra shi për metër katror, ndërsa në nivel lokal ekziston mundësia e reshjeve më ekstreme prej më shumë se 40 litra për metër katror. Priten erëra me shpejtësi nga 70 deri në 90 kilometra në orë, si dhe breshër me diametër deri në tre centimetra. Stuhia më intensive ka goditur tashmë pjesën veriore të vendit.
Në distriktin Ludwigslust-Parchim të Mecklenburg-Pomeranisë Perëndimore, ra breshër me madhësinë e një topi tenisi dhe sasi të mëdha akulli mbuluan tokën deri në atë masë sa në disa vende u desh të hiqej me makineri ndërtimi.
Qendra lokale e urgjencës raportoi se rreth 168 thirrje u morën brenda një ore për shkak të efekteve të stuhisë. Zjarrfikësit ndërhynë për shkak të bodrumeve të përmbytura dhe largimit të pemëve të rrëzuara. Deri më tani nuk raportohet për të lënduar, por ende nuk dihet shkalla e dëmeve materiale.
Në qytetin Elmshorn në shtetin e Schleswig-Holstein, stuhia shkaktoi probleme edhe për policinë. Mjeti i policisë mbeti i bllokuar në rrugën e përmbytur gjatë ndërhyrjes, pasi uji pengoi lëvizjen e mëtejshme. Askush nuk u lëndua në incident. Në të njëjtin qytet, rrufeja shkaktoi një zjarr në çatinë e një shtëpie familjare.
Kur mbërritën zjarrfikësit, ata gjetën flakë dhe tym të dendur, por shiu i rrëmbyeshëm dhe kërcënimi i goditjeve të tjera nga rrufeja e bënë të vështirë ndërhyrjen e tyre. Edhe pse fillimisht u besua se një person ishte bllokuar në shtëpi, më vonë u konfirmua se nuk u gjet askush.
