Të mos e dish presionin e gjakut është e rrezikshme

Edhe nëse numrat tuaj janë normalë tani, ata ka të ngjarë të rriten me kalimin e viteve, kështu që tre të katërtat e popullsisë amerikane mbi 65 vjeç kanë presion të lartë të gjakut. I njohur gjithashtu si hipertension, kjo gjendje e presionit të lartë të gjakut është një faktor i madh rreziku për sëmundje të shumta të zemrës dhe goditje në tru.

Shoqata zbuloi se shumica e amerikanëve nuk e dinë intervalin për presionin normal ose të shëndetshëm të gjakut, dhe akoma më shqetësues është fakti që ata mendojnë se e dinë. Studiuesit anketuan më shumë se 6500 amerikanë në lidhje me njohuritë e tyre për presionin e gjakut. Studimi, i cili u publikua në janar të këtij viti, zbuloi se 64 për qind e të anketuarve ishin të sigurt për njohuritë e tyre për presionin e gjakut, por vetëm 39 për qind dinin në fakt matjet e sakta për presionin normal të gjakut.

Keqkuptime të tilla mund të jenë fatale për disa njerëz, pasi do t’i pengojnë ata të kërkojnë ndihmë për të rregulluar presionin e gjakut. Shkaku i këtyre keqkuptimeve vjen nga zyrat e mjekëve, ku nuk i kushtojnë rëndësi presionit të gjakut të të gjithëve, por mjekët fokusohen vetëm te problemi për të cilin ka ardhur pacienti. Për shkak të kësaj, vetëm një në katër pacientë me presion të lartë të gjakut do të kërkojë ndihmë dhe do të rregullojë presionin e tyre. Përveç kësaj, shqetësues është edhe fakti që hipertensioni zakonisht nuk ka simptoma të dukshme, thotë studimi i ri.

Për të zvogëluar rrezikun e sulmeve në zemër, është shumë e rëndësishme që njerëzit të dinë masat e duhura të presionit normal të gjakut, kjo është veçanërisht e vërtetë për pacientët me sëmundje të zemrës dhe veshkave dhe diabet.

Presioni i gjakut matet me dy numra. Numri i parë tregon presionin sistolik, i cili tregon presionin e gjakut në arterie ndërsa zemra rreh. Ndërsa numri i dytë tregon presionin diastolik, i cili, nga ana tjetër, mat presionin e gjakut në arteriet midis rrahjeve të zemrës.

Presioni normal ose i shëndetshëm i gjakut duhet të jetë nën 120/80 (mm Hg) për të rriturit. Faza e parë e hipertensionit, e cila konsiderohet faza fillestare e presionit të lartë të gjakut, fillon me 130/80. Hipertensioni i fazës 2, i cili është një gjendje më e avancuar e presionit të lartë të gjakut, fillon në 140/90.

Të dy fazat janë jashtëzakonisht të rëndësishme, sepse çdo rritje prej 20 mm Hg në shkallën e presionit sistolik dhe 10 mm Hg në presionin diastolik, dyfishon shanset për vdekje nga ataku në zemër dhe goditje në tru.