Trump: Budallenjtë ziliqarë mendojnë se nuk jam mjaftueshëm i ashpër me Iranin
Presidenti i SHBA-së, Donald Trump, ka hedhur poshtë kritikat pas nënshkrimit të marrëveshjes me Iranin, duke i përshkruar kundërshtarët e tij si “ziliqarë, të pandershëm ose budallenj”.
“Ata budallenj që mendojnë se nuk kam qenë mjaftueshëm i ashpër me Iranin, ndërsa tregu i aksioneve po arrin nivele rekord dhe çmimet e naftës po bien, janë ose ziliqarë, të pandershëm ose budallenj”, shkroi Trump në llogarinë e tij në rrjetet sociale.
Sipas marrëveshjes, Irani do të fitojë qasje në asetet e ngrira jashtë vendit dhe një heqje graduale të sanksioneve të SHBA-së mbi eksportet e naftës pas zbatimit të saj.
Marrëveshja ka tërhequr kritika në median amerikane dhe në Izrael, ku ata besojnë se nuk zgjidh çështjet që lidhen me programet bërthamore dhe raketore të Iranit. Zëvendëspresidenti i SHBA-së, JD Vance, kritikoi atë që e quajti “panik të çuditshëm” në Izrael, duke theksuar se marrëveshja nuk parashikon lëshime pa një ndryshim në sjelljen e Iranit.
Ndërkohë, tensionet vazhdojnë në Liban, ku janë regjistruar sulme të reja ajrore izraelite që nga shpallja e marrëveshjes.
