Trump: India nuk do të blejë naftë nga Irani, por nga Venezuela

Presidenti i SHBA-së, Donald Trump, tha mbrëmë se India do të blejë naftë nga Venezuela në vend që të blejë naftë nga Irani.

“Ne e kemi arritur tashmë atë marrëveshje, konceptin e marrëveshjes”, u tha Trump gazetarëve në bordin e Air Force One ndërsa udhëtonte nga Uashingtoni për në pronën e tij në Florida.

Reuters raportoi të premten se Shtetet e Bashkuara i kanë thënë Nju Delhit se India së shpejti mund të rifillojë blerjen e naftës venezueliane për të ndihmuar në bllokimin e eksporteve të naftës ruse, duke cituar tre persona të njohur me çështjen.

India nuk importon sasi të konsiderueshme të naftës iraniane për shkak të sanksioneve amerikane, por u bë një blerës i madh i naftës ruse pasi pushtimi i Ukrainës nga Rusia në vitin 2022 shkaktoi sanksione perëndimore që uli çmimin e saj.

Trump dyfishoi tarifat mbi importet indiane në 50% në gusht për të ushtruar presion mbi Nju Delhin që të ndalonte blerjen e naftës ruse, dhe në fillim të këtij muaji tha se norma mund të rritet përsëri nëse importet e naftës ruse nuk frenohen.

Sekretari i Thesarit, Scott Besant, sinjalizoi në janar se një tarifë shtesë prej 25 përqind për mallrat indiane mund të hiqet, duke pasur parasysh atë që ai e quajti një rënie të ndjeshme të importeve të naftës ruse nga India.

Në mars të vitit 2025, Trump vendosi një tarifë prej 25% për vendet që blejnë naftë venezueliane, përfshirë Indinë. Qeveria amerikane këtë javë hoqi disa sanksione mbi industrinë e naftës së Venezuelës për ta bërë më të lehtë për kompanitë amerikane shitjen e naftës së tyre të papërpunuar.

Komentet e Trump të shtunën duket se pasqyrojnë një përmirësim të vazhdueshëm në marrëdhëniet SHBA-Indi, të cilat kanë qenë të tensionuara gjatë vitit të kaluar.

Trump tha gjithashtu se Kina mund të arrijë një marrëveshje me Shtetet e Bashkuara për të blerë naftë venezueliane.

“Kina është e mirëpritur dhe do të bënte një marrëveshje të shkëlqyer për naftën”, tha Trump, pa dhënë më shumë detaje.