Vatikani do të përdorë inteligjencën artificiale për të përkthyer Meshat

Dhe Vatikani nuk dëshiron të heqë dorë nga mundësitë që ofron inteligjenca artificiale, kështu që bazilika papnore “Shën Pjetri” në Vatikan po bashkëpunon me kompaninë e shërbimeve gjuhësore “Translated” për të krijuar përkthime të drejtpërdrejta në 60 gjuhë.

“Ne duam t’i shërbejmë misionit që përcakton zemrën e Kishës Katolike, universale në vetë thirrjen dhe rolin e saj”, tha Kardinali Mauro Gambetti.

Shërbimi do t’u lejojë besimtarëve të ndjekin Meshën në telefonat e tyre inteligjentë dhe do të lançohet javën e ardhshme, gjatë festimeve kryesore në Bazilikën e Shën Pjetrit që shënojnë 400-vjetorin e shenjtërimit të saj.

Përkthimi me anë të inteligjencës artificiale do të funksionojë nëpërmjet një kodi QR që vizitorët mund ta skanojnë në hyrjet e Vatikanit. Ata do të kenë përkthime audio dhe teksti në kohë reale nëpërmjet shfletuesve të tyre të internetit, pa pasur nevojë të shkarkojnë një aplikacion.

Sistemi i përkthimit përdor Lara-n, një mjet të inteligjencës artificiale të zhvilluar nga Translated në bashkëpunim me Carnegie-AI LLC dhe Profesor Alexander Weibel, një pionier në përkthimin e të folurit të asistuar nga inteligjenca artificiale.