Zbulohet një “ilaç” për pagjumësinë

Çrregullimet e zakonshme të gjumit ndonjëherë mund të shkaktohen nga vaktet e rënda para gjumit, nxehtësia ose ndonjë faktor i tretë i jashtëm, por nëse zgjoheni në të njëjtën orë çdo natë, mund të vuani nga pagjumësia.

Jeni nga ata njerëz që, sado herët të shkoni në shtrat, zgjoheni çdo natë midis orës 2 dhe 3 të mëngjesit? Rezulton se ky fenomen, i njohur si zgjimi i mesit të natës (MOTN), është mjaft i zakonshëm. Një studim zbuloi se 35% e njerëzve përjetojnë zgjime të tilla tre ose më shumë herë në javë, raporton Unilad.

Pagjumësia është një çrregullim i gjumit që e bën të vështirë të biesh në gjumë ose të qëndrosh në gjumë. Ndonjëherë ju bën të zgjoheni shumë më herët nga sa keni planifikuar, edhe pse keni shkuar në shtrat në një kohë të arsyeshme. Simptoma të tjera të zakonshme të pagjumësisë përfshijnë lodhjen gjatë ditës, nervozizmin dhe dëshirën për të fjetur gjatë ditës, ndërsa përpiqeni të mbyllni sytë gjatë natës.

Sipas një sondazhi të porositur nga Akademia Amerikane e Mjekësisë së Gjumit, 12% e amerikanëve thanë se ishin diagnostikuar me pagjumësi kronike në të kaluarën. Nëse kjo tingëllon e njohur, mund t’i keni provuar tashmë të gjitha të ashtuquajturat kura mrekullibërëse, si meditimi dhe joga, ose mjeku juaj mund t’ju ketë përshkruar pilula gjumi.

Lajmi i mirë është se hulumtimet e reja mbi këtë çështje sugjerojnë se dy aktivitete të thjeshta në javë mund të lehtësojnë simptomat e pagjumësisë.

Hulumtimi i ri, i botuar në revistën Family Medicine and Community Health, zbuloi se të gjitha llojet e aktivitetit fizik kanë një ndikim pozitiv në problemet e gjumit, veçanërisht tek të rriturit e moshuar. Kjo përfshin gjithçka, nga çiklizmi dhe noti te mësimet e salsa-s dhe shumë më tepër.

Gjegjësisht, është konfirmuar se aktiviteti fizik mund të zvogëlojë stresin dhe ankthin – dy faktorë të zakonshëm që kontribuojnë në pagjumësi. Lëvizja gjithashtu stimulon prodhimin e endorfinës, rregullon temperaturën e trupit dhe rregullon pozitivisht ritmin cirkadian.