Meta ka pezulluar hulumtimin e saj të brendshëm mbi efektet e Facebook-ut dhe Instagram-it në shëndetin mendor, pasi ka gjetur prova shkakësore që produktet e saj dëmtojnë shëndetin mendor të përdoruesve, sipas një padie nga distriktet shkollore të SHBA-së kundër Meta-s dhe platformave të tjera.
Në një studim të vitit 2020 me emrin e koduar Project Mercury, shkencëtarët në Meta, një kompani në pronësi të Mark Zuckerberg, bashkëpunuan me firmën kërkimore Nielsen për të vlerësuar ndikimin e “çaktivizimit” të Facebook dhe Instagram, sipas dokumenteve të Meta të marra gjatë procedurave gjyqësore, raporton Reuters.
Për zhgënjimin e kompanisë, “njerëzit që ndaluan së përdoruri Facebook për një javë raportuan ndjenja më të ulëta depresioni, ankthi, vetmie dhe krahasimi social”, thuhet në dokumentet e brendshme.
Në vend që të publikohen këto rezultate ose të ndiqen kërkime të mëtejshme, në dosje thuhet se Meta ndaloi punën e mëtejshme dhe deklaroi brenda kompanisë se rezultatet negative të studimit ishin kompromentuar nga “narrativat ekzistuese mediatike” në lidhje me kompaninë.
Megjithatë, punonjësit e siguruan privatisht Nick Clegg, kreun e atëhershëm të politikave publike globale të Metës, se gjetjet e studimit ishin të vlefshme.
“Studimi i Nielsen tregon një efekt shkakor në krahasimin social”, thuhet se shkroi një studiues i paidentifikuar (me një emoji fytyre të pakënaqur). Një tjetër anëtar i stafit shprehu shqetësimin se mbulimi i rezultateve negative do të ishte si industria e duhanit, e cila “kryeu studimin, e dinte se cigaret ishin të dëmshme dhe e mbajti informacionin për vete”.
Pavarësisht provave të veta për një lidhje shkakësore midis produkteve të saj dhe efekteve negative në shëndetin mendor, dokumenti pretendon se Meta i tha Kongresit se nuk kishte asnjë mënyrë për të përcaktuar dëmet që produktet e saj u shkaktonin vajzave adoleshente.
Në një deklaratë të lëshuar të shtunën, zëdhënësi i Meta-s, Andy Stone, tha se studimi u ndalua sepse metodologjia e tij ishte e gabuar dhe se kompania po punon me zell për të përmirësuar sigurinë e produkteve të saj.
“Procesverbali i plotë do të tregojë se për më shumë se një dekadë ne kemi dëgjuar prindërit, kemi studiuar çështjet më të rëndësishme dhe kemi zbatuar ndryshime të vërteta për të mbrojtur adoleshentët”, tha një zëdhënës i Metës, sipas Reuters.
