Acevski: Më shumë resurse njerëzore për punë më efikase të sektorëve të inspektimit dhe drejtësisë

Njeriu i parë i Entit Shtetëror të revizionit, Maksim Acevski, në paraqitjen e tij të mbrëmshme në emisionin “360 Gradë” në Alsat vlerëson se për punë më efikase të shërbimeve të inspektimit, por edhe gjyqësorit duhet të zgjidhet problemi me mungesën e resurseve njerëzore në disa prej sektorët kryesorë në vend.

„ Nëse ju në vazhdimësi me vite i ndani më pak mjete pushtetit gjyqësor, nuk siguroni resurse të mjaftueshme njerëzore për pushtetin gjyqësor, nuk siguroni resurse të mjaftueshme për Prokurorinë publike, nuk siguroni resurse të mjaftueshme njerëzore për Entin shtetëror të revizionit dhe gjitha organeve tjera që kanë një rol të caktuar të kontrollit dhe inspektimit, si mund të prisni rezultate dhe ta japin kontributin e tyre?…“, thotë Acevski.