Aktivistët mjedisorë mbledhin 650,000 bishta cigaresh në Lisbonë

Aktivistët mjedisorë mblodhën rreth 650,000 bishta cigaresh dhe i grumbulluan në një shesh në qendër të Lisbonës sot në një përpjekje për të mobilizuar njerëzit për ndotjen e shkaktuar nga cigaret.

“Kemi kërkuar nga të gjithë në Portugali që t’i bashkohen këtij projekti, për të tërhequr vëmendjen ndaj ndotjes plastike. Ka plastikë të fshehur në bishtat e cigareve dhe shumë njerëz nuk e dinë këtë”, shpjegoi Andreas Noe, një 34-vjeçar gjerman që mori pjesë në këtë iniciativë.

“Një bisht i vogël cigareje është një shembull i mrekullueshëm se si secili prej nesh mund të ndërmarrë veprime, jo vetëm për bishtat e cigareve dhe mbeturinat, por edhe për ndotjen detare dhe, në fund të fundit, për krizën klimatike,” shtoi ai.

Noe u vendos në Portugali gjashtë vjet më parë dhe më pas hoqi dorë nga karriera e tij (ai është një biolog molekular) për t’u fokusuar vetëm në mbrojtjen e mjedisit. Dy vjet më parë ai arriti të mbledhë rreth një milion bishta cigaresh për dy muaj.

“Ne duam t’i japim fund këtij problemi duke i nxitur njerëzit të hedhin bishtat e cigareve në koshin e plehrave, kudo tjetër përveç tokës”, tha David Figueira, një nga pjesëmarrësit në mobilizim.