BE investon 8 miliardë euro për mikroçipa ‘Made In Europe’

Bashkimi Evropian shpreson të rrisë prodhimin vendas të gjysmëpërçuesve dhe të kapë 20% të tregut global deri në vitin 2030.

Një grup i ri subvencionesh evropiane për mikroçipet është në rrugë e sipër.

Komisioni Evropian miratoi të enjten një këst prej 8.1 miliardë eurosh, ndihmë shtetërore për prodhimin e gjysmëpërçuesve “Made in Europe”.

56 kompani të madhësive të ndryshme do të futen në paketën financiare për të realizuar 68 projekte në 14 shtete anëtare: Austria, Republika Çeke, Finlanda, Franca, Gjermania, Greqia, Irlanda, Italia, Malta, Holanda, Polonia, Rumania, Sllovakia dhe Spanja.

Komisioni shpreson se paratë publike do të sjellin 13.7 miliardë euro në investime private dhe kështu do të mobilizojnë një total prej pothuajse 22 miliardë eurosh nga tani deri në vitin 2032, datë në të cilën të gjitha projektet pritet të arrijnë në fazën përfundimtare.

Produktet e para, megjithatë, mund të jenë të disponueshme në treg që në vitin 2025.

“Ky është një projekt i madh. Janë shumë fonde që shkojnë në këto projekte,” tha Margrethe Vestager, nënkryetarja ekzekutive e Komisionit Evropian, përgjegjëse për konkurrencën. Projektet do të fokusohen në kërkimin dhe zhvillimin e “teknologjive efikase të burimeve” si çipat, procesorët dhe sensorët, shpjegoi Vestager.

Miratimi është bërë në kuadrin e të ashtuquajturave “Projekte të Rëndësishme me Interes të Përbashkët Europian”, një lloj sipërmarrjeje nga e cila supozohet të përfitojnë jo vetëm vendet që injektojnë ndihmën, por e gjithë ekonomia evropiane.