Kompania amerikane e teknologjisë hapësinore Blue Origin, në pronësi të themeluesit të Amazon, Jeff Bezos, ka njoftuar se do të pezullojë fluturimet e turizmit hapësinor për të paktën dy vjet për t’u përqendruar në qëllimin e kthimit të astronautëve në Hënë.
Blue Origin njoftoi sot se do të ndalojë fluturimet e raketave të saj New Shepard dhe do të ” ridrejtojë burimet për të përshpejtuar më tej zhvillimin e aftësisë për të dërguar njerëz në Hënë”, tha kompania në një deklaratë.
“Vendimi pasqyron angazhimin e Blue Origin ndaj qëllimit kombëtar për t’u kthyer në Hënë dhe për të vendosur një prani të përhershme dhe të qëndrueshme në Hënë”, shtoi deklarata.
Blue Origin është e përfshirë në programin Artemis të NASA-s, i cili synon të kthejë astronautët në Hënë për herë të parë në më shumë se 50 vjet, si bazë për misionet e ardhshme në Mars.
Kompania ka ofruar udhëtime të shkurtra hapësinore për turistët që nga viti 2021, dhe Bezos mori pjesë në fluturimin e parë me pilot.
Blue Origin tha se gjithsej 98 persona kanë qenë në hapësirë në 38 fluturime, përfshirë këngëtaren Katy Perry dhe aktorin William Shatner.
Turizmi hapësinor për të pasurit është kritikuar që në fillim për përfitimet e tij të kufizuara shkencore, ndikimin negativ në mjedis dhe klimë, si dhe natyrën e tij elitiste.
Blue Origin nuk e ka njoftuar zyrtarisht koston e udhëtimit, por vlerësimet sugjerojnë se është në rangun e qindra mijëra dollarëve.
