Bisedimet me Bullgarinë, institucionet nuk zbulojnë planin aksional
Mbetet e panjohur nëse kërkesat e Sofjes rreth çështjeve të identitetit maqedonas janë pjesë e propozim-planit aksionar, që një ditë më parë ministrja e jashtme bullgare, Zaharieva ia dorëzoi Përfaqësuesit special, Buçkovski. Mediat bullgare zbulojnë se dokumenti përmban hapjen e kampuseve bullgare në universitetet e vendit dhe librat e historisë. Ndërsa Buçkovski vetëm tha se dokumenti është përgjigjja e shumëpritur nga Sofja ndaj propozim-planit aksionar, që Shkupi ia kishte dorëzuar kohë më parë. Buçkovski tha se qëndrim, vendi do të ndërtojë, vetëm pasi ta shqyrtojë në tërësi.
E gjithë kjo duhet të krijojë besim mes Qeverive dhe shteteve. Pavarësisht intensitetit të takimeve të mia, është i dukshëm interesi i dy palëve që të mos lejon ngrirjen e komunikimit vetëm përmes mediave apo ndërmjetësuesve – tha Vllado Buçkovski, Përfaqësues special i Qeverisë.
Është paralajmëruar që plani aksionar dypalësh të nënshkruhet në takimin e radhës të komisionit të përbashkët ndërqeveritar, por ende nuk është caktuar data e mbajtjes së të njëjtit. Ndërkohë opozita maqedonase e akuzon Qeverinë se po bën tregti me identitetin maqedonas.
Pyesim nëse dokumenti i ri kërkon adaptim të historisë me të vërtetën bullgare historike? A kontestohet gjuha maqedonase dhe tani duhet të bëhet fusnotë? A bëhet reforma arsimore e Milla Carovskës me qëllim të anulimit të lëndës së historisë dhe përmbushjes së disa kërkesave nacional-shoviniste që i ngjajnë kërkesave të shekullit 19? – deklaroi Stefan Andonovski, VMRO DPMNE.
Ndërkohë, Ministri i Jashtëm, Osmani mohoi ekzistencën e propozim-aneksit bullgar, 12 pikësh, i cili sipas zv/kryeministrit bullgar, Karakaçanov është kusht për fillimin e negociatave të vendit me Bashkimin Evropian.
Nuk e di për cilin dokument flitet, nuk ka dokument që emërohet aneks dhe i cili ka 12 pika – ka deklaruar Osmani.
Së fundmi, Karakaçanov tha se Shkupi mund ta ketë mbështetjen e Sofjes për t’i filluar bisedimet me BE-në vetëm nëse e pranon aneksin 12 pikësh, që përfshin heqjen dorë nga pretendimet historike dhe për pakicë maqedonase në Bullgari dhe ndryshim të sistemit arsimor.
Anesa Salihu
