Dodik foli pas disa ditësh heshtje, pas tij janë muret e Kremlinit

Lideri serb i Bosnjës Milorad Dodik, i cili po kërkohet nga organet gjyqësore dhe agjencitë policore në Bosnje dhe Hercegovinë, ka njoftuar sonte se ka mbërritur në Moskë. “Kam mbërritur në Moskë”, tha Dodik në një video të shkurtër të postuar në rrjetin social X.

Pasi kaloi javën e kaluar në Izrael, nga ku u largua papritur të enjten, kur u shpall mysafir i padëshiruar në një konferencë kushtuar luftës kundër antisemitizmit, Dodik ka qëndruar në një vend të panjohur. Ai tani ka treguar se ka mbërritur në Rusi, duke e ilustruar këtë me një video që tregon muret e Kremlinit pas tij.

Ai ka shpjeguar se fillimisht ka bërë homazhe për rusët e vrarë në Luftën e Dytë Botërore dhe më pas ka thënë se planifikon të jetë sërish në Moskë më 9 maj, kur atje do të festohet përvjetori i fitores mbi fashizmin.

➡️ Стигао сам у Москву. Сваки мој боравак овдjе почињем посјетом споменику Незнаном јунаку како бих одао пошту 28 милиона страдалих Руса у Другом свјетском рату.

➡️ Овдjе ћу бити поново 9. маја на позив предсједника Руске Федерације Владимира Путина на обиљежавању 80. гoдишњице… pic.twitter.com/CMd5jqYda8

— Милорад Додик (@MiloradDodik) March 31, 2025

Gjykata e BiH kërkon lëshimin e një urdhër-arresti ndërkombëtar

“Rusia ka mbështetjen tonë,” tha Dodik, duke e përshkruar Putinin si një “udhëheqës historik” që rilindi Rusinë dhe ishte gjithashtu i pari që filloi luftën kundër “elitës globaliste” dhe pohoi se presidenti amerikan Donald Trump tani po merr pjesë në këtë luftë së bashku me Putinin.

Dodik nuk shpjegoi pse ai udhëtoi për në Moskë ndërsa po përballet me një urdhër arresti në BiH dhe ndërsa Gjykata e BiH po kërkon nga Interpoli që të lëshojë një urdhër arresti ndërkombëtar për të.

Gjykata e Bosnjës dhe Hercegovinës urdhëroi Dodik, Kryeministrin e Republikës Srpska Radovan Višković dhe Kryetarin e Parlamentit të atij entiteti Nenad Stevandić të mbahen në paraburgim për një muaj pasi që të tre refuzuan t’i përgjigjen thirrjeve nga Prokuroria e Bosnjës dhe Hercegovinës për përfundimin e urdhrit penal të padisë Bosnjë dhe Hercegovinë.