Dy ligjet shumë të rëndësishme që duhet të miratohen para zgjedhjeve lokale, assesi të zhbllokohen për shkak të mungesës së badenterit

Gazetare: Fatlume Dervishi

Kodi zgjedhor dhe Ligji për vetëqeverisje lokale janë dy nga ligjet e rëndësishme për procesin zgjedhor të tetorit, por që nuk miratohen assesi. Për të dy ligjet, pushtetit i mungon badenteri, gjegjësisht mbështetja e Frontit Evropian.

Partitë nuk japin qëndrime të reja, duke thënë se nuk kanë lëvizur nga pozitat e tyre. Shumica kërkon që ndryshimet në Kodin zgjedhor të miratohen. Zvarritja e ndryshimeve sa i përket pragut të nënshkrimeve për kandidatët e pavarur, ka lënë në situatë të paqartë qytetarët dhe organizatat të cilat duan të dorëzojnë lista të pavarura në zgjedhjet lokale të tetorit. Mosmiratimi i ndryshimeve që janë në procedurë parlamentare krijon boshllëk ligjor pasi Gjykata Kushtetuese kishte shfuqizuar dispozitat paraprake. Ndërkohë kandidatët e pavarur dhe OJQ-të nuk janë të kënaqur as me propozimin partive VMRO, ZNAM, LSDM dhe VLEN që kandidatët e pavarur duhet të mbledhin së paku 1% të numrit total të votuesve në komunë.

Në prag të zgjedhjeve lokale, pushteti nuk ka arritur të zgjidhë akoma as ngecjen e ligjit të ri për vetëqeverisje lokale. Propozimi ka mbetur në Kuvend, për shkak të mungesës së badenterit. Ministri Zllatko Perinski ditë kohë më parë i bëri thirrje opozitës të mbështesë ndryshimet.

“Ajo që është detyrë e Ministrisë për Vetëqeverisje Lokale, ne e bëmë. Më lejoni edhe një herë të dërgoj apel deri te opozita e drejtuar nga BDI-ja dhe LSDM-ja t’i tejkalojnë egot e tyre dhe ta mbështesin këtë propozim-ligj sepse qytetarëve por edhe krerëve të komunave do t’ua hapë më shumë dyert sa i takon komunikimit me qytetarët dhe sigurisht e jep mekanizmin e shkarkimit me referendum të kryerit të komunës gjë që mendoj se është shumë e rëndësishme të jetë si mundësi”, kishte thënë Zllatko Perinski, Ministër i Vetëqeverisjes Lokale.

Ndër ndryshimet më të rëndësishme të Ligjit për vetëqeverisje lokale është mundësia për shkarkimin e krerëve të komunave me referendum. /Alsat.mk