Ushtarët amerikanë duhet të përgatiten jo vetëm për luftime në orbitën e Tokës, por edhe rreth Hënës, tha gjenerali Dan Kaine, kryetar i Shtabit të Përbashkët të Ushtrisë Amerikane dhe këshilltar i lartë ushtarak i Presidentit Donald Trump.
Kane e bëri këtë deklaratë pasi SHBA-të njoftuan për herë të parë se kishin vendosur një armë në orbitën e Tokës, por nuk thanë se sa kohë kishte qëndruar atje.
Në një konferencë, Kaine tha se ushtria amerikane duhet të përshtatet tani për të qenë “e përgatitur për të luftuar, për të duruar dhe për të fituar nga Toka në orbitën hënore”.
Në vitin 2019, gjatë mandatit të tij të parë presidencial (2017-2021), Donald Trump themeloi një shërbim të ri ushtarak – Forcën Hapësinore.
Këto forca po përgatiten për luftime në hapësirë dhe rreth Hënës, ndërsa “njerëzimi përparon në thellësitë e hapësirës dhe detyra e Forcës Hapësinore është të jetë gati për të mbrojtur interesat e Shteteve të Bashkuara”, tha për mediat kreu i këtyre forcave, gjenerallejtënant Gregory Gunjon.
Kina ka krijuar gjithashtu një forcë hapësinore ushtarake në vitin 2024, me qëllim zhvillimin e aftësive për t’u përballur me krizat në hapësirë.
Pekini tha të martën se Kina “gjithmonë mbështet përdorimin paqësor të hapësirës së jashtme, ruan sigurinë e hapësirës së jashtme dhe kundërshton vendosjen e armëve, militarizimin dhe garën e armatimeve në hapësirën e jashtme”. Pekini paralajmëroi Uashingtonin të “ndalojë zgjerimin e përgatitjeve të tij ushtarake në hapësirën e jashtme”.
Është e paqartë nëse vendosja e armëve amerikane në hapësirë dhe planet e mundshme për përdorimin e tyre rreth Hënës do të shkelnin traktatet ndërkombëtare që parandalojnë militarizimin e hapësirës.
Traktati i Hapësirës së Jashtme i vitit 1967, i nënshkruar nga Shtetet e Bashkuara dhe Kina, përcakton që trupat qiellorë si Hëna mund të përdoren “ekskluzivisht për qëllime paqësore” dhe se armët bërthamore nuk mund të vendosen në hapësirë. Shtetet “objektet hapësinore” të të cilave shkaktojnë dëme janë të detyruara të kompensojnë për atë dëm.
Dy vjet më parë, pati raportime amerikane se Rusia po zhvillonte armë hapësinore.
Më pas, në Kombet e Bashkuara u ripërtërinë përpjekjet për të kufizuar më tej militarizimin e hapësirës.
Rusia vuri veton ndaj një rezolute të përbashkët SHBA-Japoni që do t’u bënte thirrje të gjitha kombeve të mos zhvillonin ose vendosnin armë bërthamore dhe armë të tjera të shkatërrimit në masë në hapësirën e jashtme. Një rezolutë rivale ruse për të ndaluar të gjitha armët në hapësirën e jashtme “përgjithmonë” dështoi gjithashtu.
Lidhur me traktatin e vitit 1967, Gjenerali Gunjon tha se Forca Hapësinore Amerikane “do të vazhdojë të kryejë operacione hapësinore të sigurta dhe të përgjegjshme në çdo cep të hapësirës”.
Megjithatë, ai nuk donte të thoshte se cila është politika e Forcës Hapësinore Amerikane dhe ushtrisë amerikane në përgjithësi në lidhje me përdorimin e municioneve dhe raketave në hapësirë, dhe i udhëzoi gazetarët t’i bënin pyetje Pentagonit, i cili ende nuk është përgjigjur ndaj mesazheve të dërguara.
Sipas raportimeve të medias, Genjon njoftoi gjithashtu një dyfishim të Forcës Hapësinore në katër vitet e ardhshme – në rreth 25,000 anëtarë.
