Hekurudhat gjermane nxjerrin në ankand qindra biçikleta të harruara

Operatori gjerman hekurudhor Deutsche Bahn do të shesë qindra biçikleta të mbetura në stacione anembanë Gjermanisë në javët e ardhshme.

Kompania hekurudhore njoftoi se disa ankande janë planifikuar të mbahen deri në fund të majit dhe do të organizohen në qytetet kryesore duke përfshirë Berlinin, Leipzig, Dresden dhe Mynih.

Rreth 2,700 biçikleta gjenden çdo vit në rreth 5,400 stacione në të gjithë vendin, tha një zëdhënëse e Deutsche Bahn, sipas agjencisë dpa.

Rreth gjysma e këtyre biçikletave shiten në ankand pasi ruhen për të paktën 10 javë, ndërsa ato në gjendje të keqe hidhen, tha ajo.

Çmimi i një biçiklete në ankand ndryshon në varësi të gjendjes dhe llojit. Mesatarisht, biçikletat shiten për rreth 60 euro, tha zëdhënësja, dhe disa biçikleta elektronike kushtojnë më shumë se 300 euro, megjithëse janë të rralla.

Ankandet në qytete si Berlini priren të tërheqin turma të mëdha, duke krijuar konkurrencë për oferta. Megjithatë, blerësit që kërkojnë biçikleta për fëmijë mund të kenë një shans më të mirë, pasi kërkesa është zakonisht më e ulët në këtë kategori, tha agjencia.