Humb jetën një ushtar shqiptar në Afganistan

Një efektiv i Forcave të Armatosura të Shqipërisë, i dislokuar në Afganistan, ka humbur jetën. A2CNN raporton se bëhet fjalë për 45-vjeçarin Xhevair Iljazi, komando i batalionit 2, në Herat. Majori ka humbur jetën në rrethana ende të paqarta.

Njoftimi për shtyp i Ministrisë së Mbrojtjes së Shqipërisë:

Ministria e Mbrojtjes dhe Shtabi i Përgjithshëm i Forcave të Armatosura të Shqipërisë njoftojnë se dje, në orën 22:40, ora lokale në Afganistan, ka humbur jetën ushtaraku me inicialet XH.J.
Autoritetet e Ministrisë së Mbrojtjes dhe Shtabit të Përgjithshëm po bashkëpunojnë me komandën e operacionit për të bërë hetimin e plotë të rrethanave në të cilat ka ndodhur ngjarja.
Ministri i Mbrojtjes dhe Shefi i Shtabit të Përgjithshëm sigurojnë personelin në mision dhe familjet e tyre se do të vijojnë të mbështesin e t’u gjenden pranë për të përmbushur me sukses misionin.
Ministria e Mbrojtjes, Shtabi i Përgjithshëm dhe gjithë personeli i Forcave të Armatosura i shprehin ngushëllimet më të ndjera familjes për ndarjen e parakohshme nga jeta të njeriut tyre të dashur.